Чыпка Жаңылыктар

2021-жылдын 1-январынан тартып Казакстан Республикасы Евразия экономикалык бирлигинин органдарында төрагалыкты кабыл алды. Биздин бирикменин иштешинин биринчи беш жылдыгынын жыйынтыгы боюнча, Евразия экономикалык бирлиги ийгиликтүү жана жагымдуу интеграциялык долбоор катары калыптанды деп ишенимдүү айтууга болот.

Евразия экономикалык комиссиясынын Кеңеши 23-декабрда жасалма вискоза булаларынын айрым түрлөрүнө карата алып келүү бажы алымынын коюмун 2021-жылдын 31-декабрына чейин 5%дан 0%га чейин төмөндөтүү жөнүндө чечим кабыл алды.

ЕЭК Кеңеши Евразия экономикалык бирлигинин "Суюк жана газ түрүндөгү углеводороддорду ташуу үчүн магистралдык куурларга талаптар жөнүндө" техникалык регламентин бекитти. Ал 2021-жылдын 1-июлунда күчүнө кирмекчи.

Жалпы рынокто продукциянын тартыштыгынын алдын алуу жана пандемиянын бизнес үчүн кесепеттерин азайтуу үчүн ЕЭК Кеңеши ЕАЭБде продукциянын шайкештигин баалоонун атайын жол-жоболорун киргизиди. Бул бир жылдык мөөнөткө киргизилип жаткан убактылуу чаралар жана алар сериялуу чыгарылуучу продукцияны сертификаттоодо колдонулат.

Евразия экономикалык комиссиясынын Коллегиясы 22-декабрда "Айыл чарба жаныбарларын жана алардан алынган продукцияны (материалды) асыл тукум продукция деп таанууга карата бир түргө келтирилген мамилелер жөнүндө" деп аталган сунуштаманы бекитти.

Евразия экономикалык комиссиясынын Коллегиясынын экономика жана каржы саясаты боюнча мүчөсү (министр) Тимур Жаксылыков ЕЭК Коллегиясынын отурумунда экономикалык интеграциялык процесстердин бизнес жүргүзүү шарттарына таасиринин негизги көрсөткүчтөрүн түзүү жана колдонуу боюнча эл аралык иш-тажрыйба жана ЕАЭБдин мүчө мамлекеттеринин тажрыйбасы жөнүндө баяндама жасады.

Аларды ыктыярдуу негизде колдонуунун натыйжасында техникалык регламенттин талаптарынын аткарылышы камсыз кылынган стандарттардын тизмегине жаңыдан кабыл алынган 11 мамлекеттер аралык стандарт, Тизмекте буга чейин камтылган стандарттардын ордуна кабыл алынган 20 мамлекеттер аралык стандарт, ошондой эле Беларусь Республикасынын жаңы иштелип чыккан 2 улуттук стандарты киргизилди.

ЕЭКтин Интеграцияны өнүктүрүү департаментинин директору Гоар Барсегян жана Куба Республикасынын Россия Федерациясындагы Атайын Ыйгарым укуктуу Элчиси Хулио Антонио Гармендия Пенья 22-декабрда өткөрүлгөн жумушчу жолугушуунун жүрүшүндө Гаванага Евразия экономикалык бирлигинин алдындагы байкоочу мамлекеттин статусу берилгендигин эске алуу менен Евразия экономикалык комиссиясынын жана Кубанын кызматташтыгынын иш-тажрыйбалык аспектилерин талкуулашты. Аталган жолугушуу ЕЭКтин штаб-квартирасында болуп өттү.

Евразия экономикалык комиссиясынын Коллегиясы 22-декабрда токсикокинетиканы изилдөө жана дары-дармек препараттарын токсикологиялык изилдөөлөрдө тутумдук таасирди баалоо боюнча колдонмону бекитти. Документ 2021-жылдын июль айында күчүнө кирмекчи.

ЕЭК Коллегиясы 22-декабрда активдүү фармацевтикалык субстанцияларды иштеп чыгуу жана өндүрүү боюнча колдонмону бекитти. Документ активдүү фармацевтикалык субстанцияларды өндүрүү процессин пландаштыруу жана аларды иштеп чыгуу көлөмдөрү боюнча көрсөтмөлөрдү камтыйт. Бул өндүрүштүн критикалык баскычтарын аныктоого жана фармацевтикалык субстанциялардын сапат көрсөткүчтөрүн мыктылоого мүмкүндүк берет.