Еуразиялық экономикалық комиссия Алқасы 9 ақпанда Қытай Халық Республикасынан әкелінетін дәнекерленген құбырлардың және тот баспайтын болаттан жасалған пішімдердің бірқатар түріне демпингке қарсы баж енгізу туралы шешім қабылдады. Баж бес жыл мерзімге енгізіледі, ставка мөлшері өндірушіге байланысты 14,62%-дан 17,28%-ға дейін құрайды.

«Бұл өнім қолданылатын негізгі салалар сантехника мен жылу алмастырғыштар өндірісі, автомобиль жасау, тамақ өнеркәсібі, мұнай-химия және атом саласы, жиһаз өндірісі мен инфрақұрылым құрылысы болып табылады», — деп атап өтті Комиссияның сауда блогында.

ЕЭК Алқасының шешімі ресми жарияланған күнінен бастап күнтізбелік 30 күн өткен соң күшіне енеді.

Анықтама

ҚХР-дан әкелінетін дәнекерленген құбырларға және пішімдерге қатысты демпингке қарсы тергеп-тексеру «ТМК-Инокс», «Марчегалия РУ», «Балтинокс» компаниялары берген және «Техно Трейд» ЖШҚ қолдаған арызды қарау нәтижелері бойынша 2019 жылғы 24 желтоқсанда басталды.

Тергеп-тексеру барысында алынған ақпарат ҚХР-дан әкелінетін тауардың демпинг импорты және мүше мемлекеттердің экономикасы саласына материалдық нұқсаны бар екендігі туралы қорытынды жасауға мүмкіндік берді. Тергеп-тексеру нәтижелері бойынша ЕЭК сайтында 2020 жылғы қарашада Ішкі нарықты қорғау департаментінің баяндамасы жарияланды.​