Завершаны пераходны перыяд па тэхрэгламенце ЕАЭС на рыбу і рыбную прадукцыю

«У краінах ЕАЭС завяршылася дзеянне старых дакументаў аб ацэнцы адпаведнасці рыбы і рыбнай прадукцыі абавязковым патрабаванням, усталяваным да прыняцця тэхрэгламенту ЕАЭС «Аб бяспецы рыбы і рыбнай прадукцыі»», - тлумачыць дырэктар Дэпартамента тэхнічнага рэгулявання і акрэдытацыі Еўразійскай эканамічнай камісіі (ЕЭК) Цімур Нурашаў.

Зараз уся харчовая рыбная прадукцыя – рыба, водныя млекакормячыя і беспазваночныя, водарасці і іншыя водныя расліны – выпускаецца ў абарачэнне выключна з дакументамі аб ацэнцы адпаведнасці патрабаванням тэхнічнага рэгламенту, а не як раней з дакументамі аб ацэнцы адпаведнасці патрабаванням, у тым ліку нацыянальнага заканадаўства.

Гаворка ідзе не толькі аб свежых рыбе і іншай воднай прадукцыі. Дакументы на адпаведнасць патрабаванням рыбнага тэхрэгламенту патрэбны на ахалоджаныя, марожаныя, вяленыя, сушаныя, марынаваныя, салёныя, падвэнджаныя і многія іншыя віды прадуктаў. Сярод іх – харчовая рыбная прадукцыя для дзіцячага харчавання, фарш, кансервы, прэсервы, ікра, харчовы тлушч з рыбы, водных млекакормячых і беспазваночных і г.д.

Ён нагадаў, што гэты тэхнічны рэгламент Саюза быў прыняты Саветам ЕЭК у 2016 годзе. Тады ж вызначаны пераходныя палажэнні, у тым ліку тыя, якія падаўжаюць час прымянення раней выдадзеных дэкларацый аб адпаведнасці і сертыфікатаў адпаведнасці. Гэта дазволіла бізнесу паступова перайсці да новых патрабаванняў бяспекі да рыбы і рыбнай прадукцыі, абнавіўшы тэхналогію вытворчасці.

Тэхрэгламентам ЕАЭС усталяваны адзіныя абавязковыя для прымянення і выканання ва ўсіх краінах Саюза патрабаванні бяспекі харчовай рыбнай прадукцыі, якая выпускаецца ў абарачэнне на саюзным рынку. А таксама нормы па маркіроўцы і ўпакоўцы харчовай рыбнай прадукцыі для забеспячэння яе свабоднага перамяшчэння ў ЕАЭС. Акрамя таго, дакумент распаўсюджваецца на патрабаванні да працэсаў вытворчасці, захоўвання, перавозкі, рэалізацыі і ўтылізацыі.

Тэхнічны рэгламент вызначыў мікрабіялагічныя нарматывы бяспекі, максімальна дапушчальныя ўзроўні ўтрымання ў харчовай рыбнай прадукцыі ветэрынарных прэпаратаў і лекавых сродкаў, гігіенічныя патрабаванні, харчовую каштоўнасць і паказчыкі бяспекі харчовай рыбнай прадукцыі для харчавання дзяцей і іншыя.

На саюзны рынак не дапускаецца харчовая рыбная прадукцыя, вырабленая з атрутных рыб шэрагу сямействаў, якая не адпавядае спажывецкім уласцівасцям па арганалептычных паказчыках, марожаная, якая мае тэмпературу ў тоўшчы прадукту вышэй за мінус 18 °C, якая падверглася размарожванню ў перыяд захоўвання, якая змяшчае небяспечныя для здароўя чалавека біатаксіны (фікатаксіны).

Тэхнічны рэгламент прадугледжвае, што рыбная прадукцыя, якая адказвае ўсталяваным нормам і якая прайшла ацэнку адпаведнасці, маркіруецца адзіным знакам абарачэння прадукцыі на рынку ЕАЭС.

Дзяржкантроль над выкананнем патрабаванняў тэхрэгламенту ажыццяўляецца згодна з заканадаўствам дзяржаў-членаў. Упаўнаважаныя органы краін Саюза абавязаны прыняць усе меры для абмежавання і забароны выпуску харчовай рыбнай прадукцыі, якая не адпавядае тэхрэгламенту, а таксама для зняцця яе з абарачэння.