Вынікі пасяджэння Еўразійскага міжурадавага савета

У пасяджэнні прынялі ўдзел Старшыня ЕМУС, Прэм'ер-міністр Рэспублікі Беларусь Раман Галоўчанка, Прэм'ер-міністр Рэспублікі Арменія Нікол Пашынян, Прэм'ер-міністр Рэспублікі Казахстан Аскар Мамін, выконваючы абавязкі Прэм'ер-міністра, першы віцэ-прэм'ер-міністр Кыргызскай Рэспублікі Арцём Новікаў, Старшыня Ўрада Расійскай Федэрацыі Міхаіл Мішусцін, Старшыня Калегіі Еўразійскай эканамічнай камісіі Міхаіл Мясніковіч, а таксама Прэм'ер-міністр Рэспублікі Малдова Іён Кіку.

Старшыня Калегіі Еўразійскай эканамічнай камісіі Міхаіл Мясніковіч далажыў аб дапрацоўцы праекта Стратэгічных напрамкаў развіцця еўразійскай эканамічнай інтэграцыі да 2025 года.

Міжурадсавет зацвердзіў пералік выключэнняў і абмежаванняў на ўнутраным рынку Саюза, якія падлягаюць ліквідацыі ў 2021-2022 гадах. У спісе 12 пазіцый, у тым ліку 1 выключэнне і 11 абмежаванняў.

Кіраўнікі ўрадаў даручылі Камісіі і дзяржавам-членам працягнуць працу над праектам змяненняў у тэхрэгламент «Аб бяспецы харчовай прадукцыі». Змяненні неабходны для ўрэгулявання праблемы рознай інтэрпрэтацыі вынікаў кантролю рэшткаў утрымання ветэрынарных лекавых сродкаў у харчовай прадукцыі жывёльнага паходжання, у тым ліку перапрацаванай. 

Акрамя таго, быў зацверджаны план мерапрыемстваў, неабходных для забеспячэння функцыянавання адзінага рынку паслуг у сферы будаўніцтва ў ЕАЭС. Дакумент прадугледжвае распрацоўку і заключэнне міжнароднага дагавора ў рамках ЕАЭС аб узаемным прызнанні прафесійнай кваліфікацыі кіруючага тэхнічнага персаналу ў сферы будаўніцтва ў 2022 годзе.

Камісія далажыла Міжурадсавету аб зацвярджэнні Правіл вызначэння краіны паходжання асобных тавараў для мэт дзяржаўных закупак. Правіламі прадугледжваецца вядзенне Камісіяй еўразійскага рэестра прамысловых тавараў дзяржаў-членаў ЕАЭС. Мэта дакумента – забяспечыць роўны доступ да дзяржзакупак у ЕАЭС пастаўшчыкоў з усіх краін Саюза.

Разгледжана пытанне абмежавання на перамяшчэнне лому і адходаў чорных і каляровых металаў з тэрыторыі Казахстана чыгуначным транспартам у іншыя краіны ЕАЭС. Камісіі даручана прапрацаваць пытанне дадаткова і далажыць аб выніках на наступным пасяджэнні ЕМУС.

Таксама кіраўнікі ўрадаў разгледзелі пытанне аб прадстаўленні Вышэйшаму Еўразійскаму эканамічнаму савету кандыдатуры члена Савета Камісіі ад Кыргызскай Рэспублікі.